Se vi ankoraŭ ne spertiĝis pri la programlingvo Prologo, sed ja pri aliaj programlingvoj imperativaj aŭ funkcia, vi estu avertita: Prologo funkcias laŭ sufiĉe aliaj principoj. Vi devas lerni pensadon ne laŭ paŝoj de algoritmo, sed laŭ partoj de la problemo. La programparadigmon de Prologo oni nomas deklara aŭ logika. Oni ankaŭ parolas pri programlingvo de la kvina generacio.

Se alie, vi jam spertas pri datumbazoj, kaj scias kiel modeli laŭ tabeloj, rigardoj kaj formuli demandojn al via datumbazo, tiam vi jam bone scias pensadon laŭ rilatoj. La demandlingvoj de datumbazoj kiel ekzemple SQL ja estas deklaraj. Tio tre helpos al vi en Prologo. Ni detaligos tion ankoraŭ en la tria lekcio.

Por la interagaj ekzemploj en tiu ĉi kurseto ni uzas τ-Prologon, realigitan en Javoskripto kaj funkcianta do plene en via retumilo.

Faktoj kaj atomoj

Ni unue difinu la romajn ciferojn kiel faktoj, indikante ankaŭ ilian valoron en arabaj ciferoj. La ciferojn mem ni esprimas per atomoj (tio estas nomoj de niaj scieroj). Atomoj devas aŭ esti minusklaj aŭ donitaj en citiloj.

roma_cifero('I',1).
roma_cifero('V',5).
roma_cifero('X',10).
roma_cifero('L',50).
roma_cifero('C',100).
roma_cifero('D',500).
roma_cifero('M',1000).

Demandoj kaj variabloj

Poste ni povas pridemandi la donitajn faktojn pri romaj ciferoj laŭ diversaj manieroj. Ĉe tio ni uzas variablojn. Variabloj devas esti majusklaj (sen citiloj). Atentu, ke variabloj en Prologo ne funkcias kiel variabloj en aliaj programlingvoj: ne ekzistas komando por ŝanĝi la valoron de variablo: X = X + 1 ĉiam estas malvera, same kiel en matematika formulo. Sed ja oni povas aserti X1 = X + 1 por trovi solvojn al tia aserto.

1. Kiom valoras la roma cifero C? (kun variablo Valoro)

roma_cifero('C',Valoro).

2. Kiu roma cifero havas la valoron kvindek?

roma_cifero(Roma,50).

3. Ĉu la roma cifero D havas la valoron mil?

roma_cifero('D',1000).

Tasko: Ĉu vi povas ŝanĝi la supran demandon tiel, ke la respondo estos jes?

4. Kiuj romaj ciferoj havas valoron pli grandan ol 50?

roma_cifero(Roma,Valoro), Valoro>50.

La komon legu kiel kaj, la punktokomon legu kiel aŭ! La fina ne signifas: ne troviĝis plia solvo. En Prologo fakte uziĝas true (vera) kaj false (malvera). Ni ŝanĝis ilin por tiu ĉi kurso al jes kaj ne.

5. Kiuj romaj ciferoj havas valoron 50 aŭ 500?

roma_cifero(Roma,Valoro), (Valoro=50;Valoro=500).

Tasko: Demandu pri ĉiuj romaj ciferoj, kies valoro estas cent aŭ pli malalta ol cent! (Laŭplaĉe vi povas uzi punktokomon kiel ‘aŭ’, sed ankaŭ rilaton =<)